Skip over navigation

Mugisha Moïse yegukanye ‘Royal Nyanza Race’

Mugisha Moïse mu bagabo na Ingabire Diane mu bagore, ni bo begukanye Isiganwa ry’Amagare “Royal Nyanza Race” ryakinwe kuri uyu wa Gatanu, tariki ya 30 Ukuboza 2022.

Iri siganwa risoza umwaka wa 2022 mu marushanwa yateguwe n’Ishyirahamwe Nyarwanda ry’Umukino w’Amagare, ryitabiriwe n’amakipe 18.

Ayo arimo 11 asanzwe ari abanyamuryango ba FERWACY, ane yatumiwe n’andi atatu akina amasiganwa yo ku rwego rwa Afurika arimo Benediction Ignite, May Stars na ProTouch.

Abakinnyi bose bahagurukiye ku Ngoro y’Abami, bafata umuhanda wo ku Rwibutso rwa Nyanza- Kwigira Museum- Akarere- ILPD- Nyanza Visitor Center- Maranatha- Ku Kinamba (Eliot) – Rerumwana - Ku Bigega - Ku Kinamba (Eliot)- Mark Cables Factory – Agakiriro - Mugonzi (Kuri 40) - Nyanza Market - Kiristu Umwami Mu Gakenyeri kwa Musinga - Mater Dei – Gatsintsino - Dayenu Hotel – Iposita – ILPD Umurenge wa Busasamana no ku Iposita, hareshya n’ibilometero birindwi.

Abagabo bakuru bazengurutse inshuro 15 ku ntera y’ibilometero 116,5. Nyuma yo kuzenguruka inshuro eshatu ni bwo Mugisha Moïse yacitse abarimo Muhoza Eric, Manizabayo Eric na Niyonkuru Samuel bari bayoboranye isiganwa.

Mugisha wigeze gushyiramo hafi iminota ibiri, yakomeje kuyobora isiganwa ariko ubwo hari hasigaye kuzenguruka inshuro ebyiri, ibihe biragabanuka.

Uyu mukinnyi wa ProTouch yegukanye isiganwa akoresheje amasaha atatu, iminota 20 n’amasegonda atatu, akurikirwa na Manizabayo Eric ‘Karadiyo’ wa Benediction Ignite, amusize amasegonda atatu naho Iradukunda Étienne na we wa Benediction Ignite, yabaye uwa gatatu asizwe iminota ine n’amasegonda 29.

Nyuma yo gutsinda, Mugisha uri kwitegura Tour du Rwanda 2023 ndetse akaba ari mu biganiro n’ikipe yo muri Espagne, yavuze ko yagowe no kuzenguruka inshuro ebyiri za nyuma, byatumye Karadiyo ashaka kumushyikira.

Ati “Nyanza irazamuka, kuzenguruka inshuro ebyiri za nyuma byangoye ni yo mpamvu mwabonye Karadiyo yari agiye kumfata.”

Mu batarengeje imyaka 23, Tuyizeye Étienne yabaye uwa mbere, akurikirwa na Niyonkuru Samuel (wa kane ku rutonde rwose) ndetse na Habimana Jean Eric wa gatanu ku rutonde rw’abakinnyi 17 basoje muri 46 b’abagabo bakuru batangiye isiganwa.

Ingabire Diane waherukaga gutsindira i Musanze nk’uko byagenze no kuri Mugisha Moïse, ni we watsinze no mu bagore i Nyanza.

Yabigezeho nyuma yo gukora intera y’ibilometero 94 mu masaha atatu, iminota 14 n’amasegonda 25, ahigitse Nirere Xaverine bagenderaga hamwe mu gice kinini cy’isiganwa aho yamusize amasegonda abiri gusa.

Mukashema Josiane ukinana na Ingabire muri Benediction Club ni we wabaye uwa gatatu asizwe iminota 16 n’amasegonda 46 naho Nzayisenga Valentine wa Canyon/Sram Team yo mu Budage (izerekezamo Ingabire mu 2023), aba uwa kane asizwe iminota 24 n’amasegonda 16.

Abakinnyi batatu barimo Tuyishime Jacqueline, Muhoza Josiane na Mukamuhire Irène ntibigeze basoza isiganwa.

Abandi bakoze iyi ntera y’ibilometero 93 ni ingimbi, aho hatsinze Tuyizere Hashimu wa Les Amis Sportifs nyuma yo gukoresha amasaha atatu, umunota umwe n’amasegonda 15. Yakurikiwe na Mushinzimana Phocas [Nyabihu Cycling Team] yasize isegonda ndetse na Shyaka Janvier na we wasizwe isegonda.

Mu bangavu bazengurutse intera y’ibilometero 79, uwa mbere yabaye Iragena Charlotte wa Bugesera Cycling Team, akoresheje amasaha abiri, iminota 52 n’amasegonda atatu aho yakurikiwe na Mwamikazi Djazilla wa Les Amis Sportifs amusize amasegonda atandatu naho Uwera Aline wa Bugesera aza nyuma y’iminota ibiri n’amasegonda ane.

Aba bakinnyi ba Bugesera Cycling Team bakoranye kugira ngo batsinde Mwamikazi Djazilla wari umaze kubigarurira dore ko yabatsindiye i Kibeho n’i Musanze mu masiganwa aheruka.

Meya w’Akarere ka Nyanza, Ntazinda Erasme, yavuze ko iri siganwa ryagenze neza ku buryo rigiye kubatera imbaraga zo kuba bajya baritegura kabiri mu mwaka.

Ati “Ni isiganwa ryagenze neza, abaturage bishimye, biragaragara ko bari barinyotewe. Biraduha imbaraga zo kugira ngo twongere gutegura andi marushanwa nk’aya. Turifuza ko ryazajya riba kabiri ku mwaka, tukarihuza n’ibindi bikorwa birimo igitaramo twita ‘Nyanza Twataramye’.”

Ku ruhande rwa Perezida w’Ishyirahamwe ry’Umukino w’Amagare mu Rwanda (FERWACY), Murenzi Abdallah, we yavuze ko uyu mwaka wa 2022 usojwe neza kuko habaye amasiganwa menshi mu gihe gito.

Ati “Tuwusoje neza kuko muri aya mezi atandatu asoza umwaka, twabashije gukora amasiganwa umunani hirya no hino mu gihugu. Muri uku kwezi kwa 12, dukoze amasiganwa atatu. Biratanga icyizere ko ubuzima bw’igare bugenda bumera neza.”

Yongeyeho mu mwaka utaha hateganyijwe amasiganwa agera kuri 15 amenshi muri yo akaba ari ashingiye ku masezerano yasinywe hagati ya FERWACY n’uturere.

Ati “Tuzahera muri Mutarama. Umwaka wose uzaba ari uw’amasiganwa. Nta kuvuga ngo turahagarika mu gihe runaka.”

Irushanwa ryitiriwe Intwari z’Igihugu ni ryo rizabimburira ayandi muri Mutarama 2023.

Official FERWACY Partners

top